بلاشبہ جس کام کی نسبت کاملین کی طرف ہو اس کو مقبولیت حاصل ہوتی ہے۔ معاملات و معمولات کا دارومدار اللہ رب العزت کے فضل و کرم ہی پر ہوتا ہے۔ بلاشبہ ختم قادریہ شریف کی نسبت حضور غوث پاک رضی اللہ تعالیٰ عنہ کی طرف ہے، صدیوں سے صالحین کے معمولات میں شامل رہا ہے اور اس کی بے شمار برکتیں ہیں جن میں چند کا تذکرہ کیا جارہا ہے جن کا سماعا کتابوں میں ذکر ہے، اس کے ورد سے بے نمازیوں کو توبہ کی توفیق نصیب ہوگئی۔ جو نماز تو پڑھتے تھے مگر باجماعت سے نہیں، اس ورد کی برکت سے باجماعت نماز کے پابند ہوگئے، اللہ تعالیٰ کی ذات پر توکل اور اعتماد کی توفیق حاصل ہوگئی، نماز تہجد کے پابند ہوگئے، اس کی برکت سے سالہا سال کا لاپتہ شخص مل گیا، آپریشن والے امراض سے شفا نصیب ہوگئی۔ اس کی برکت سے رشتوں کی رکاوٹیں دور ہو جاتی ہیں، روزی میں برکت اور حصول میں آسانی فراہم ہو جاتی ہے، اثرات بد یعنی سحر، آسیب، جادو، ٹونا اور بد نظری کا خاتمہ ہوجاتا ہے۔ حرام روزی سے تائب ہوجاتے ہیں، نیز سودی کاروبار سے نجات حاصل ہوجاتی ہے، مسلسل تین ختم شریف میں شریک ہونے والے پڑھنے والے پر بارگاہِ غوثیت سے بے شمار فیوض و برکات کا نزول ہوتا ہے۔ الغرض بیماریوں سے شفا پانے، بلاؤں کو دور کرنے، مشکلوں کے آسان ہونے، قیدیوں کی رہائی کے لئے، قرض سے چھٹکارہ پانے، ہر طرح کی بلا و آفت کے دفعیہ کے لئے ورد کیا جائے۔